Exodus 11
1ⲡⲉϫⲁϥ ⲛⲇⲉ ⲛϭⲓ ⲡϫⲟⲉⲓⲥ ⲙⲙⲱⲩⲥⲏⲥ ϫⲉ ⲉⲧⲓ ⲕⲁⲓⲡⲗⲏⲅⲏ ⲛⲟⲩⲱⲧ ⲧⲉ ⲉϯⲛⲁⲛⲧⲥ ⲉϩⲣⲁⲓ ⲉϫⲙ ⲫⲁⲣⲁⲱ ⲁⲩⲱ ⲉϩⲣⲁⲓ ⲉϫⲛ ⲕⲏⲙⲉ ⲙⲛⲛⲥⲱⲥ ϥⲛⲁⲕⲁⲧⲏⲩⲧⲛ ⲉⲃⲟⲗ ϩⲙ ⲡⲉⲉⲓⲙⲁ ⲉϥⲛⲁⲕⲁⲧⲏⲩⲧⲛ ⲇⲉ ⲉⲃⲟⲗ ϥⲛⲁⲛⲉϫⲧⲏⲩⲧⲛ ⲉⲃⲟⲗ ϩⲓ ⲟⲩⲥⲟⲡ ϩⲛ ⲟⲩⲛⲟⲩϫⲉ ⲉⲃⲟⲗ 2ϣⲁϫⲉ ϭⲉ ϩⲛ ⲟⲩϩⲱⲡ ⲉⲙⲙⲁⲁϫⲉ ⲙⲡⲗⲁⲟⲥ ⲁⲩⲱ ⲙⲁⲣⲉⲡⲟⲩⲁ ⲡⲟⲩⲁ ⲁⲓⲧⲓ ⲉⲃⲟⲗ ϩⲓⲧⲟⲟⲧϥ ⲙⲡⲉϥϩⲓⲧⲟⲩⲱϥ ⲁⲩⲱ ⲟⲩⲥϩⲓⲙⲉ ⲉⲃⲟⲗ ϩⲓⲧⲟⲟⲧⲥ ⲛⲧⲉⲧϩⲓⲧⲟⲩⲱⲥ ⲛϩⲉⲛϩⲛⲁⲁⲩ ⲛϩⲁⲧ ⲙⲛ ϩⲉⲛϩⲛⲁⲁⲩ ⲛⲛⲟⲩⲃ ⲁⲩⲱ ϩⲉⲛϩⲟⲉⲓⲧⲉ 3ⲡϫⲟⲉⲓⲥ ⲇⲉ ⲁϥϯ ⲛⲟⲩϩⲙⲟⲧ ⲙⲡⲉϥⲗⲁⲟⲥ ⲙⲡⲉⲙⲧⲟ ⲉⲃⲟⲗ ⲛⲣⲣⲙⲛⲕⲏⲙⲉ ⲁⲩϯ ⲛⲁⲩ ⲁⲩⲱ ⲡⲣⲱⲙⲉ ⲙⲙⲱⲩⲥⲏⲥ ⲁϥϣⲱⲡⲉ ⲛⲟⲩⲛⲟϭ ⲙⲡⲉⲙⲧⲟ ⲉⲃⲟⲗ ⲛⲣⲣⲙⲛⲕⲏⲙⲉ ⲁⲩⲱ ⲙⲡⲉⲙⲧⲟ ⲉⲃⲟⲗ ⲙⲫⲁⲣⲁⲱ ⲙⲛ ⲛⲉϥϩⲙϩⲁⲗ 4ⲁⲩⲱ ⲡⲉϫⲁϥ ⲛϭⲓ ⲙⲱⲩⲥⲏⲥ ϫⲉ ⲛⲁⲓ ⲛⲉ ⲉⲧⲉⲣⲉⲡϫⲟⲉⲓⲥ ϫⲱ ⲙⲙⲟⲟⲩ ϫⲉ ϩⲣⲁⲓ ϩⲛ ⲧⲡⲁϣⲉ ⲛⲧⲉⲩϣⲏ ⲁⲛⲟⲕ ϯⲛⲏⲩ ⲉϩⲣⲁⲓ ⲉⲕⲏⲙⲉ 5ⲛϥⲙⲟⲩ ⲛϭⲓ ϣⲣⲡⲙⲙⲓⲥⲉ ⲛⲓⲙ ϩⲣⲁⲓ ϩⲙ ⲡⲕⲁϩ ⲛⲕⲏⲙⲉ ϫⲓⲛ ⲙⲡϣⲣⲡⲙⲙⲓⲥⲉ ⲙⲫⲁⲣⲁⲱ ⲡⲁⲓ ⲉⲧϩⲙⲟⲟⲥ ϩⲓ ⲡⲉϥⲑⲣⲟⲛⲟⲥ ϣⲁϩⲣⲁⲓ ⲉⲡϣⲣⲡⲙⲙⲓⲥⲉ ⲛⲧϩⲙϩⲁⲗ ⲉⲧϩⲁⲧⲛⲡⲙⲁ ⲛⲛⲟⲩⲧ ⲁⲩⲱ ϣⲁϩⲣⲁⲓ ⲉⲡϣⲣⲡⲙⲙⲓⲥⲉ ⲛⲧⲃⲛⲏ ⲛⲓⲙ 6ⲛϥϣⲱⲡⲉ ⲛϭⲓ ⲟⲩⲛⲟϭ ⲛⲁϣⲕⲁⲕ ϩⲣⲁⲓ ϩⲙ ⲡⲕⲁϩ ⲧⲏⲣϥ ⲛⲕⲏⲙⲉ ⲡⲁⲓ ⲙⲡⲉⲟⲩⲟⲛ ϣⲱⲡⲉ ⲛⲧⲉϥϩⲉ ⲉⲙⲛⲟⲩⲟⲛ ⲛⲁϣⲱⲡⲉ ⲙⲛⲛⲥⲱϥ 7ϩⲛ ⲛϣⲏⲣⲉ ⲛⲇⲉ ⲧⲏⲣⲟⲩ ⲙⲡⲓ︤ⲏ︦ⲗ︥ ⲙⲛⲟⲩϩⲟⲣ ⲛⲁϯϩⲣⲟⲟⲩ ϩⲙ ⲡⲉϥⲗⲁoⲥ ⲟⲩⲧⲉ ϫⲓⲛ ⲙⲡⲣⲱⲙⲉ ϣⲁϩⲣⲁⲓ ⲉⲡⲧⲃⲛⲏ ϫⲉⲕⲁⲥ ⲉⲕⲉⲛⲁⲩ ⲉⲛⲉϣⲡⲏⲣⲉ ⲉⲧⲉⲣⲉⲡϫⲟⲉⲓⲥ ⲛⲁⲁⲁⲩ ϩⲣⲁⲓ ϩⲛ ⲧⲙⲏⲧⲉ ⲛⲕⲏⲙⲉ ⲙⲛ ⲡⲓ︤ⲏ︦ⲗ︥ 8ⲛⲧⲉⲛⲉⲕϩⲙϩⲁⲗ ⲧⲏⲣⲟⲩ ⲉⲓ ⲉⲡⲉⲥⲏⲧ ⲉⲣⲁⲧⲛ ⲛⲥⲉⲟⲩⲱϣⲧ ⲛⲁⲓ ⲉⲩϫⲱ ⲙⲙⲟⲥ ϫⲉ ⲃⲱⲕ ⲉⲃⲟⲗ ⲙⲛ ⲡⲉⲕⲗⲁⲟⲥ ⲧⲏⲣϥ ⲡⲁⲓ ⲛⲧⲟⲕ ⲉⲧⲕϩⲓϫⲱϥ ⲁⲩⲱ ⲙⲛⲛⲥⲁ ⲛⲁⲓ ϯⲛⲁⲃⲱⲕ ⲉⲃⲟⲗ ⲁⲙⲱⲩⲥⲏⲥ ⲇⲉ ⲉⲓ ⲉⲃⲟⲗ ϩⲓⲧⲛ ⲫⲁⲣⲁⲱ ϩⲛ ⲟⲩϭⲱⲛⲧ 9ⲡⲉϫⲁϥ ⲛⲇⲉ ⲛϭⲓ ⲡϫⲟⲉⲓⲥ ⲙⲙⲱⲩⲥⲏⲥ ϫⲉ ⲫⲁⲣⲁⲱ ⲛⲁⲥⲱⲧⲙ ⲉⲣⲱⲧⲛ ⲁⲛ ϫⲉⲕⲁⲥ ⲉⲉⲓⲉⲧⲁϣⲟ ⲛⲛⲁⲙⲁⲉⲓⲛ ⲙⲛ ⲛⲁϣⲡⲏⲣⲉ ϩⲣⲁⲓ ϩⲙ ⲡⲕⲁϩ ⲛⲕⲏⲙⲉ ⲙⲡⲉⲙⲧⲟ ⲉⲃⲟⲗ ⲙⲫⲁⲣⲁⲱ 10ⲙⲱⲩⲥⲏⲥ ⲛⲇⲉ ⲙⲛ ⲁⲁⲣⲱⲛ ⲁⲩⲉⲓⲣⲉ ⲛⲙⲙⲁⲉⲓⲛ ⲙⲡⲉⲙⲧⲟ ⲉⲃⲟⲗ ⲙⲫⲁⲣⲁⲱ ⲡϫⲟⲉⲓⲥ ⲇⲉ ⲁϥϯⲛϣⲟⲧ ⲙⲡϩⲏⲧ ⲙⲫⲁⲣⲁⲱ ⲙⲡϥⲟⲩⲱϣ ⲉⲕⲱ ⲉⲃⲟⲗ ⲛⲛϣⲏⲣⲉ ⲙⲡⲓ︤ⲏ︦ⲗ︥ ϩⲙ ⲡⲕⲁϩ ⲛⲕⲏⲙⲉ
Copyright information for
CopSahBible2